НОВИ САД – После того як є 13. юния отримана у Доме школярох „Бранково коло”, закончуюца годзина руского язика за штредньошколцох у Новим Садзе, всоботу, 18. юния, отримана и за школярох котри на годзини виучованя руского язика ходзели до Штреднєй Технїчней школи (ТШ) „Милева Марич Айнштайн”.
Годзини руского язика у Новим Садзе тримала наставнїца Ванеса Медєши, у тим школским року отримани вєдно 53 наставни годзини хтори нащивйовали 25 нашо школяре котри ше школую у новосадских штреднїх школох – дзешецеро у ТШ и 15-еро у спомнутим доме школярох.
И на тей закончуюцей годзини присуствовала и секретар Дружтва за руски язик, литературу и култури Ирина Папуґа, котра школяром подаровала виданя „Руского слова” и Дружтва, школярох похвалєла на опредзелєносци и витирвалосци же би и на штредньошколским ступню виучовали свой мацерински язик, а наставнїцу Медєшову на роботи.
На закончуюцей годзини надпомнуте же школяре под час школского рока були уключени и до програмох Дружтва – Поетских нїткох „Меланиї Павлович”, Дньох Миколи М. Кочиша, а означели и Медзинародни дзень мацеринского язика.
