Закончуюци рахунок прилапени, нє и звит Управи за капитални укладаня

автор 021/ртв/сен; фото 021 
914 Опатрене

НОВИ САД – Скупштина Войводини пондзелок, 18. юлия, прилапела закончуюци рахунок за 2015. рок, и попри тим же посланїки владаюцей векшини критиковали розподзельованє лоньского буджету. Як потолковане, нєприлапйованє рахунку би можебуц спричинєло застановйованє уплацованя трансферних средствох з уровню Републики.

– Нє жадаме давац причину же би Републична Влада, чи одвичательни министер, нєприлапйованє даяких актох похопели як нагоду же би ше застановело посиланє трансферних средствох Войводини – гварел Миленко Йованов з владаюцей СНС.

Пондзелкову, штварту схадзку Скупштини Войводини означела оштра полемика о Звиту о дїлованю Покраїнского Фонду за капитални укладаня за 2013. и 2014. рок, хтори и нє прилапени.

Посланїки з ДС, котри предводзели векшину у прешлим мандату, твердзели же явни финансиї були одвичательно и транспарентно водзени, а бешеда о нєрационалней администрациї и трошкох ше нє склада з фактом же Покраїна у цалосци випочитовала шицки вимоги о рационализциї управи.

На другим боку, предсидатель Покраїнскей влади Иґор Мирович гварел же гражданє фалшиво информовани о дзепоєдних вельки инвестицийох, а окреме о „Каменїци 2”. Вон наявел же терашня власц утвердзи шицки неґативни точки хтори означели роботу предходней власци и будзе применьовац нову програму у обласцох у хторих то нєобходне, як цо здравство.

– По конєц рока 300 милиони динари буду уложени до набавки опреми за реґионални шпиталї, клїнїки и институти Клїнїчного центру Войводини, прето же ту стан найгорши – гварел Мирович.

Кед слово о инициятиви Покраїнскей влади за утвердзованьом традицийних символох АП Войводини, Мирович гварел же вони предписани зоз Статутом АПВ, а вироятнє буду прилапени у септембру.

Скупштина АПВ пондзелок упозната зоз звитом Покраїнского защитнїка гражданох-омбудсмана, а покраїнски посланїки прилапели и звити о роботи фондох, заводох и орґанизацийох хтори у компетенциї Покраїни.

Медзи кадровима ришенями, Скупштина з длужносци директора Педаґоґийного заводу Войводини розришела Ленку Ердель, а за нового директора меновала Яноша Пушкаша, професора информатики зоз Зренянину.

6-APV-02

ПОВЯЗАНИ ТЕКСТИ