СУБОТИЦА – По Индексу дружтвеного розвою городох и општинох у Сербиї, хтори виробел Тим за социялне уключованє и зменшанє худобства при Влади Републики Сербиї, Суботица на основи даскелїх параметрох спада до розвитих городох и општинох. Гоч штредня нето плаца виноши 37 202 динари, цо спод републичного просеку, у Суботици формално заняти аж 48,96 одсто гражданох. Окрем того, визначує ше и високи ступень почитованя людских и меншинских правох.
Кед слово о образованю, 14,2 одсто гражданох високошколовани, цо лєм дакус менєй од просеку. Штредню школу закончели 50,01 одсто гражданох, а по податкох Индексу, трошки образованя по жительови у Суботици високи и виноша 22 167 динари.
Обласци здравства и социялней защити у Суботици, як и у векшини општинох, у барз нєвигодним стану. Слику о тим городзе, односно локалней самоуправи, губи нїзки ступень безпечносци.
Индекс дружтвеного розвою городох и општинох у Сербиї ше раз рочнє ошвижує з новима податками.