РУСКИ КЕРЕСТУР – Управни одбор Дому култури Руски Керестур вчера прилапел Финансийни звит тей установи за прешли рок, по хторим цалосни приход Дому култури виношели 8 милиони 925 322 динари, а розходи 9 милиони 030 115 динари.
Попри средствох за порядну дїялносц и манифестациї од главного финансиєра – буджету Општини Кула, фестивали и манифестациї Дому култури финансує ше и з буджетох Републики Сербиї, АП Войводини, прейґ Националного совиту Руснацох и з керестурского месного самодоприносу, так же є обовязни твориц штири финансийни плании, а єден финансийни звит.
Управни одбор вчера принєсол и Одлуку о вименки члена Статуту Дому култури, так же по новим, конкурс за директора установи будзе розписани найменєй 60 днї пред виходзеньом мандату окончователя длужносци директора, а нє 60 днї од його менованя, як було дотераз.
Припалепи и Правилнїк о Драмским мемориялє Петра Ризнича Дядї и основа представительох за членох орґанизацийних одборох трох фестивалох Дому култури -„Червеней ружи”, Драмского мемориялу и „Костельниковей єшенї”.
Вязано за Мемориял, на схадзки поведзене же тогорочни найвироятнєйше почнє 15. априла, а будзе закончени 22., лєбо 23. априла. Прилапена и суґестия же би ше консултовало нашо КУД о терминє будуцих Мемориялох, же би ше го отримовало скорей, у марцу.
На вчерайшей схадзки прилапена и Одлука о надополнєню за хаснованє Велькей сали Дому култури за промоцийни сходи у терашней предвиберанковей кампанї.