ПЕРЕҐУ МАРЕ/РУМУНИЯ – У месце Переґу Маре у Румуниї нєшка ше отримує зашеданє Шветовей ради Шветового конґресу Русинох, Руснацох, Лемкох (ШР ШКРРЛ), як и Комисиї за културу тей орґанизациї. Присутни буду и представителє Рускей матки зоз Сербиї.
Главна тема на зашеданю Шветовей ради будзе вязана за пририхтованя наступного 15. Шветового конґресу РРЛ хтори у юлию ма буц отримани у Словацкей, а на схадзки Комисиї за културу главна будзе порада о розписованю тогорочного конкурсу за додзельованє награди за културни досяги з меном Василь Турок Гетеш.
На тих зашеданьох участвовац буду и представителє Рускей матки з нашей жеми, а то предсидатель РМ и член ШР Дюра Папуґа, предсидателька Комисиї за културу ШР Саня Тиркайло и Славко Пап, член Комисиї за просвиту.
Зашеданя буду отримани у рамикох означованя Дня Русинох у Румуниї, и з тей нагоди будзе виведзена пригодна културна програма.