РУСКИ КЕРЕСТУР – Совит Месней заєднїци (МЗ) Руски Керестур пияток, 9. януара, принєсол одлуку о планє инвестицийних роботох у тим року зоз средствох месного самодоприносу, у чим будзе участвовац и Општина Кула, так же за одредзени комунални, инфраструктурни и други роботи у Керестуре вєдно плановани 6 милиони 478 080 динари.
Зоз самодоприносу за инвестицийни укладаня опредзелєни 4 милиони 954 008 динари, а з буджету кулскей општини плановани милион 524 072 динари.
Так за предлуженє асфалтованя драги до хотара, як и за асфалтованє терашнїх бетонских поверхносцох у парку у центре, зоз самодоприносу предвидзени милион 993 320 динари, а з кулскей општини 854 280 динари.
За оправянє закрица на здравственей амбуланти у Керестуре зоз самодоприносу предвидзени 705 600, а з Општини Кула 302 400 динари; за ушоренє сали за винчанє у Месней канцелариї Општинскей управи у Старей школи зоз самодоприносу опредзелєни 119 088, а Општина у тим будзе участвовац зоз 79 392 динарами, а за оправянє фонтани у центре валалу зоз самодоприносу предвидзени 336 000, а з Општини 144 000 динари.
Кулска општина би мала участвовац и у чисценю яркох и ушойованю банкинох по Керестуре зоз 144 000, а зоз самодоприносу за тоту намену предвидзени 336 000 динари.
Попри начишлєних, того року предвидзене же зоз самодоприносу будзе ушорени базен, за цо опредзелєни 180 000 динари; ушорени дзецински парк при церкви, за цо предвидзени 360 000; за явне ошвиценє на углє улїцох Йовґена Сивча и Орос Ґабра, як и у улїци Дюру Кишюгаса зоз самодоприносу предвидзени 440 000, а за поставянє камерох на уходох до валалу и у центре Керестура 480 000 динари.
Спомнути проєкти до општинского буджету буду учишлєни з його ребалансом у марцу, гварене на схадзки Совиту МЗ.