БЕОҐРАД – Од 1. януара буду важиц нови одредби за пензионованє, та старосна гранїца за пензионованє женох будзе 61 рок и найменєй 15 роки стажу, сообщел Републични фонд за пензийне и инвалидске осиґуранє.
Кажди рок ше будзе дзвигац старосну гранїцу, та плановане же по 2032. рок жени буду исц до пензиї на 65 роки, як и хлопи.
Условия за пензионованє хлопох исти – муша мац 65 роки живота и найменєй 15 роки стажу. Кед маю 45 роки стажу, хлопи и жени можу пойсц до пензиї без огляду на роки.
Же би пошли до скорейчасовей пензиї, од 1. януара хлопи муша мац 40 роки стажу и найменєй 55 роки и осем мешаци живота, а жени 37 роки стажу и найменєй 55 роки. Хто пойдзе до пензиї скорей, будзе доставац меншу пензию, а така пензия може буц зменшана найвецей 20,4 одсто.
Гражданом котри планую пойсц до пензиї по терашнїх предписаньох, роботне одношенє ше муши закончиц найпознєйше 30. децембра, а вимогу за пензию муша придац найпознєйше по 31. децембер. Пре тото, шицки филияли Републичного фонду за пензийне осиґуранє полни роботни час буду робиц и 31. децембра.