НОВИ САД – Покраїнска виберанкова комисия до вчера, 24. марца, преглашела пейц виберанково лїстини за виберанки посланїкох до Скупштини Войводини, 24. априла.
Як перша преглашена лїстина Сербскей напредней странки и єй коалицийних партнерох „Александар Вучич-Сербия победзує”; друга преглашена коалицийна лїстина „За Войводину роботи и зананя- ДС (Демократска странка), ДСГВ (Демократски союз Горватох у Войводини), Нова, ЗЕП-Желєни-Др Боян Пайтич”; а як треца преглашена коалицийна лїстина „Ивица Дачич-Социялистична партия Сербиї (СПС), Єдинствена Сербия-Драґан Маркович Палма (ЄС), Патриотски рух Сербиї (ПРС)”.
Як штварта преглашена лїстина „Ненад Чанак-Лиґа социялдемократох Войводини-Дзвигнї главу!”, а як пията лїстина „Союз войводянских Мадярох-Иштван Пастор”.
На шицких спомнутих лїстинох по 120 кандидати за покраїнских посланїкох.
На лїстини ЛСВ Олена Папуґа з Руского Керестура на 15. месце, а на коалицийней лїстини коло ДС Татяна Дудаш з Нового Орахова на 37., а Ясмина Долапчев з Вербасу на 102. месце.