РУСКИ КЕРЕСТУР – На вчерайшей схадзки Совит Месней заєднїци (МЗ) Руски Керестур прилапел план ребалансу буджету за 2015. рок, хтори виробени у догварки зоз заменїком предсидателя Општини Кула Велибором Милоїчичом, а по хторим средства МЗ зоз 13 милиони 306 000 буду звекшани на 14 милиони 987 000 динари. По ребалансу, найвекши пременки будзе у проєкту ушореня центру валалу.
– Понеже на концу того рока останє вецей як 3 милиони наменски средства за инвестициї, одлучели зме их уложиц до реновираня парку у центре Керестура. За тот проєкт наменєни вєдно 4,5 милиони динари, з чого 3 милиони 300 000 буду з месного самодоприносу, а милион 200 000 динари з буджету Општини Кула – гварел предсидатель Совиту Месней заєднїци Владимир Олеяр и додал же ребаланс МЗ будзе часц ребалансованого буджету Општини Кула.
Члени Совиту МЗ розпатрали и план приходох и розходох за 2016. рок хтори виробела Комисия за инвестициї МЗ, медзитим, одлучене же би тот план бул доробени, та ше о нїм будзе гласац на идуцей схадзки.
Пре информованє гражданох о тогорочних витворених проєктох и представянє планох за 2016. рок, на схадзки догварене же 29. новембра на 14 годзин у конференцийней сали Спортско-школскей гали будзе отримани збор гражданох Руского Керестура.
На схадзки винєшене и же у Месней заєднїци єст 62 геверни пайпи, та ше их подзелї гражданом котрим су потребни, за цо ше треба обявиц секретарови Месней заєднїци. После приявох, одредзена комисия МЗ оценї кому пайпи буду подзелєни.
На Совиту розпатрени и прилапени вимоги дзепоєдних гражданох котри коло обисцох нє маю асфастовану драгу, же би ше винашло способи за преправянє дильовох до калдермох.