КУЛА – На вчерайшей схадзки Скупштини општини (СО) Кула предсидатель Скупштини Велибор Милоїчич винєсол информацию же тих дньох розписана явна набавка за виробок проєкту за будуцу фабрику води у Руским Керестуре и Крущичу, а явна набавка вредна 3,5 милиони динари. Як гварел за Рутенпрес, после вирабяня проєкту буду познати дальши крочаї у тим напряме, як и вредносц можлївей фабрики здравей води.
Предсидатель СО Кула спомнути податок винєсол у розправи о сполньованю општинского буджету за перши тогорочни 9 мешаци на пригварку одборнїка з опозицийней ДС Бориса Шайтоша з Керестура, же у тим периодзе було мало инвестицийни роботи у Руским Керестуре. Милоїчич тиж гварел же Општина значни средства дава и за отримованє новей Спортскей гали у Керестуре.
Вязано за буджет, на схадзки визначене же за остатнї 6 мешаци Општина з висших жридлох финансованя, з Републики и Покраїни, обезпечала вецей средства як за остатнї 4 роки. Милоїчич наглашел и же на пияток будзе отворени тендер за вибудов нового Дому здравя у Кули, вредни 176 милиони динари, дзе з Министерства привреди обезпечени прейґ 70, а Општина участвує зоз 103 милиони динари.
Вчерайша, як и прешла схадзка СО Кула, звекшого була пошвецена гашеню Явного подприємства (ЯП) „Завод за вибудов Кула”, хторе з роботу престава на ютре, 1. децембра. У тим напряме принєшан Одлука о порушованю поступку за ликвидованє „Заводу”, а понеже на прешлей схадзки Скупштини одлучене же дїялносц и занятих превежню Општинска управа и штири явно-комунални подприємства (ЯКП) у местох општини, принєшана и нова Одлука о окончованю комуналней дїялносци, як и вецей одлуки о преношеню роботох „Заводу” на оддзелєня Општинскей управи и ЯКП.
Длугшу розправу на вчерайшей схадзки СО Кула виволал Предлог одлуки о висини стопи порциї на маєток у кулскей општини, на цо амандмани же би ше их зменшало, хтори нє прилапени, поднєсла опозицийна Русийска странка, хтора у СО Кула ма двох одборнїкох.
На основи вчерайшей Одлуки, стопи порциї на нєрухомосци и будовательну и польопривредну жем звекшани и будзе ше их применьоивац од 1. януара идуцого року. На жем ше порцию будзе обраховйовац по стопи од 0,2 одсто, на нєрухомосци (хижи) 0,4 одсто, дзе ше зависно од оценєнєй вредносци маєтку, основну стопу звекшує од 0,6 до 2 одсто. На будовательну жем, односно на нєрухомосц порцийного обовязнїка котри водзи дїловни кнїжки стопа порциї будзе 0,4 одсто. З тей нагоди поведзене же у одношеню на други локални самоуправи у околїску, то и надалєй найменши порцийни стопи.
Понеже дотерашнїм орґаном управяня Дому здравя Кула вишол мандат, СО Кула вчера меновала членох до Управного и до Надпатраюцого одбору тей установи. За предсидательку УО знова менована Лидия Барна з Кули, а медзи новима членми УО и др Златана Надь з Руского Керестура, спред занятих.
