РУСКИ КЕРЕСТУР – Представителє Дружтва за руски язик, литературу и културу и його рускокерестурскей Секциї, вчера на керестурским теметове положели квеце на гроби Дюру Папгаргая, Емила Гудака и шестри служебнїци Любов Фа, у присустве їх фамелийох.
Гроб писателя и културного дїяча Дюру Папгаргая нащивени з нагоди осмей рочнїци його шмерци, а почесц дата и визначному културному дїячови Емилови Гудакови и ш. Любов Фа, котри ше нєдавно упокоєли.
Пригодни слова з биоґрафийох покойних, як и Папгаргайову писню „И на остатку було слово”, виповедли представительки Дружтва Ирина Папуґа и Мария Дорошки.
Папуґова ше з тей нагоди здогадла и на други визначни особи з нашей култури, просвити и церковного живота – Петра Кузмяка, о. Андрия Лабоша, Михайла Врабеля, др Гавриїла Костельника, Яшу Бакова и Владимира Бесерминя, чийо рочнїци ше означує у тим року.