БЕОҐРАД – Путнїки хтори приходза до Сербиї на гранїчних преходох доставаю здравствени упутства о ковиду-19 – хтори симптоми указую на хороту, як ше маю справовац, на хтори числа телефонох ше можу явиц кед же почувствую даяки пременки. Здравствени брошури ше дзелї на гранїцох, бо епидемиолоґийна ситуация у окруженю у тим моменту нєвигоднєйша як у Сербиї, пише на сайту Радио-тєлвизиї Войводини.
Державни секретар Министерства здравя Берислав Векич гвари же упутства дзелєни и у першим пику и же ше одлучели на таки кроичай прето же Сербия у тей хвильки ма найстабилнєйши епидемиолоґийни статус у одношеню на жеми у окруженю.
– У упутствох ше находза шицки нєобходни податки за гражданох хтори ше врацаю до жеми – хтори манифестациї хороти, на основи хторих симптомох ше маю явиц до ковид-амбуланти, на хтори числа телефонох ше можу информовац и окочиц тестированє, потолковал Векич за медиї.
Вон назначел же епидемиолоґийна ситуация у Сербиї, кед у питаню вирус корона, стабилна, алє же нє шме буц опущованя, бо кажде нємеркованє и нєпочитованє предписаних мирох загрожи нашо здравє, алє и здравє наших членох фамелиї и роботного окруженя.
И далєй нєобходна моцна дисциплина, почитованє препоручених мирох – ношенє маски, дистанца и гиґиєна рукох и простору.