КУЛА – Општина Кула тих дньох обявела резултати розподзельованя средствох здруженьом з обласци култури, а на основи конкурованя за средства хтори у општинским буджету предвидзени за финансованє програмох и проєктох у култури, у обласци сучасней уметнїцкей творчосци и за очуванє и защиту нєматериялного културного скарбу.
У буджету Општини Кула за спомнути намени опредзелєни вєдно 8 милиони динари, а розподзелєни су 26 здруженьом и орґанизацийом з култури.
Рускому КУД „Др Гавриїл Костельник” з Кули опредзелєни 210 000 динари, а найвецей – 2,5 милиони динари опредзелєни Културно-просвитней заєднїци Општини Кула, потим 800 000 достанє КУД „Крущич”, а по 700 000 динари КУД „Иван Сенюк”, Мадярски културни центер „Непкер”, КУД „Сербия” и КУД „Дурмитор”, шицки з Кули, док КУД „Липар” достанє 490 000 динари.
Од найменєй 30 000, та по найвецей 210 000 динари достаню вєдно 18 здруженя з Кули, Червинки, Сивцу, Крущичу и Новей Червинки.
Достати пенєж здруженя и орґанзациї муша хасновац наменски, за наведзени проєкти и програми з хторима конкуровали, а о трошеню пенєжу до конца рока до Општини маю придац звити.