КУЛА – Подсекретарка у Покраїнским секретарияту за здравство, социялну политику и демоґрафию Новка Моїч вчера у Кули нащивела Здруженє за помоц ментално нєдостаточно розвитим особом „Белава птица” и як виявела за „Радио кулска комуна” – з тоту установу ресорни секретарият ма барз добре сотруднїцтво и дзечнє ю нащивює.
Нажаль, як гварела Моїчова, средства у Секретарияту релативно мали, так же того року помоц „Белавей птици”, по єй думаню, була нєдостаточна. Медзитим, виражела намаганє же би ше тераз, у Дзецинским тижню, тоти средства звекшало.
– Окреме ми мило же ше у єдней, релативно малей општини у Войводини, так озбильно роби з таку катеґорию жительства. За роботу у тей окремней социялней политики потребни винїмкови ентузиязем и знанє за успишне функционованє таких здруженьох, як цо то праве и случай у кулскей „Белавей птици” – гварела Новка Моїч вчера у Кули.