Златка Сивч Здравич достала Святосавску грамоту

автор влдї
977 Опатрене

ШИД – У сали Културно-образовного центру Шид з нагоди школскей слави святого Сави вчера отримана Святосавска академия, на хторей школяре и просвитни роботнїки котри у прешлим року посцигли позарядово резултати, достали припознанє – Святосавску грамоту.

Припознанє достали 14 школяре и седмеро просвитни роботнїки, медзи нїма и наставнїца Златка Сивч Здравич, котра у школох у шидскей општини преподава руски язик з елементами националней култури, як виборни предмет.

З тей нагоди Златка Сивч Здравич гварела же єй то найвекше припознанє хторе достала за просвитну роботу, алє є источашнє и припознанє Основней школи „Бранко Радичевич”, хтора ю предложела за доставанє Грамоти.

После уручованя припознаньох священїки сербскей православней церкви отримали обряд пошвецаня славского колачу, а потим отримани музично-сценски приказ, хтори виведли члени Аматерского театру „Бранислав Нушич” и школяре Основней музичней школи „Филип Вишнїч”.

Святосавске швето вчера означене у шицких школох и Предшколскей установи, а на соботу, 30. януара, у Спортским центре на 19 годзин Сербске КУД „Святи Сава” отрима традицийни Шветочни концерт.

Златка Сивч Здравич зоз Святосавску грамоту, у ґалериї з Академиї у Шидзе

ПОВЯЗАНИ ТЕКСТИ