НОВИ САД – Сербия ше може похвалїц з уровньом защити правох националних меншинох, цо замерковали и релевантни европски институциї, гварела шефица Прегваряцкого тиму за водзенє прегваркох о приступаню Сербиї ґу Европскей униї (ЕУ) Таня Мишчевич на Конференциї о положеню националних меншинох у Войводини, хтора вовторок, 10. новембра отримана у Скупштини АПВ.
Вона визначела же защита правох националних меншинох єдна з ґарадичох у оценьовню чи ше Сербия на одвитуюци способ пририхтує за будуце членство у ЕУ, а здогадла же защиту меншинох у держави муши запровадзиц векшина.
Защита основних людских правох и шлєбодох состойна часц и єден з трох поделементох Поглавя 23, хторе предвидзує ище и реформу судства и борби процив корупциї. Тоти реформи за процес приключованя нашей жеми до ЕУ розробени у окремним Акцийним плану.
Предсидатель Скупштини Войводини Иштван Пастор гварел же Акцийни план и законодавни рамик маю змоцнїц улогу и значносц припаднїкох националних меншинох, же би вони постали кредибилни субєкти у сфери явних роботох. Тот документ прави окремна роботна ґрупа у рамикох Поглавя 23, а без нього тото поглавє нє може буц отворене.
Покраїнски секретар за национални меншини Михаль Нїлаш на Конференциї гварел же треба унапредзиц образованє на язикох националних меншинох, роботу националних совитох и применьованє пропорцийного обезпечованя роботи.
З Акцийним планом предвидзене и же републични и локални власци муша баржей реаґовац на оцени и апели омбудсмана о почитованю правох националних меншинох. Наявени и вименки и дополнєня Закона о националних совитох, а идуци крочаї то отверанє катедри за горватски язик на Универзитету у Новим Садзе и Центру за ромски язик на Филолоґийним факултету у Беоґрадзе.