Иван Папуґа зоз Вербасу спорт окреме люби и дзечнє бави фодбал, одбойку, кошарку, и други спорти зоз лабду, лєбо без нєй. Алє у єдним нє такой таким звичайним и заступеним спорту при нас опробовал ше у младосци, пред трицец пейц роками – у падобранстве. Иванова жажда вискочиц зоз авиона почала зоз школу моделарства.
У основней школи ше дас штири-пейц роки занїмал зоз моделарством, моделовал перше ладї, а потим зоз авио-моделарством у городским Aеро-клубу. Даґдзе 1979. року до Вербасу пришла робиц Славица Лучич, хтора була державни репрезентативец у падобранстве, та ше указала нагода же би ше у клубу и зоз тим могoл занїмац. Ище єдна олєгчуюца околносц була же теди Югославянска народна армия додзельовала средства за початне обучованє за падобранцох.