НОВИ САД – Предсидатель Покраїнскей влади Иґор Мирович, предсидатель Скупштини АПВ Иштван Пастор и єденац покраїнски секретаре штварток, 28. юлия, присуствовали на схадзки з членми и партнерами Националней алиянси за локални економски розвой (НАЛЕД), а домашнї сходу були предсидателька и подпредсидатель Управного одбору НАЛЕД-у Ана Брнабич и Бранислав Недимович.
На сходзе присуствовали коло 140 представителє општинох, малих и штреднїх подприємствох зоз Сербиї, странских инвеститорох и представителє цивилного дружтва, хтори векшином члени НАЛЕД-у.
Як догварене, Покраїнска влада и НАЛЕД у септембу подпишу и окремне спорозуменє о сотруднїцтве, а прейґ хторого НАЛЕД и Покраїнска влада буду робиц на локалним економским розвою, розвою и запровадзованю явно-приватного партнерства, на розвою польопривреди, образованя, здравства и инфраструктури. Фокус будзе на злєпшованю капацитетох локалних самоуправох и канцеларийох за локални економски, хтори би обезпечовали нєбуджетни средства.
Подпредсидатель Уравного одбору НАЛЕД-у Бранислав Недимович з тей нагоди визначел же у Войводини за тераз лєм 12 локални самоуправи маю сертификати о вигодним дїловним окруженю и податки указую же то найуспишнєйши штредки, понеже од 2008. року прицагли 1,29 милиярди еври. Прето, пре прицагованє инвеститорох, важне моцнєнє канцеларийох за локални економски розвой, гварел Недимович.
НАЛЕД то здруженє компанийох, општинох и орґанизацийох цивилного дружтва хтори вєдно робя на твореню лєпших условийох за живот и роботу у Сербиї. Ма коло 220 членох, а у мрежи їх партнерох вецей як 40 державни институциї и медзинародни орґанизациї.
