У Руским културним центре у Новим Садзе уж два тижнї комби розвожи дзеци дому зоз пробох фолклору. Комби за тоту намену виєднани, а трошки зноши Национални совит Руснацох.
Фолклорни проби дзецинскей секциї отримує ше вовторок и пияток од 19.30 до 21 годзин, а дому дзеци одходза на комби превозки.
Директорка РКЦ Наташа Макаї Мудрох з тей нагоди гварела:
– Дзекуюци потримовки Националного совиту Руснацох реализовали зме идею же би дзеци после пробох одходзели дому орґанизовано на комбию. Таке ришенє ше указало як барз добре, а родичи задовольни и потримую го. Думам же им то и вельке олєгчанє, бо нє муша чекац дзеци после пробох, хтори безпечно сцигую дому. Рахуєм же нас Национални совит потрима и од септембра, бо маме наисце вше вецей заинтересовани дзеци за тоту фолклорну секцию.
Чловек цо вожи комби сотрудзує зоз РКЦ уж роками и нє раз вожел членох на велї наступи.
– Першираз и я бул у комбию кед требало одпровадзиц дзеци, же би вожач знал кадзи ма вожиц. З Матки ше перше розвожи дзеци до Петроварадину, вец на Лиман, Саймиште, Детелинару, а на концу на Салайку. Нови Сад нє мали город и нє биваю шицки блїзко при РКЦ, та воженє тирва и длужей як 40 минути – гварел Владимира Иван Вева, руководитель дзецинскей фолклорней секциї.
Тераз, после ”Пупча” закончує ше сезона пробох у тим школским року. Планує ше ище єдну пробу, хтора будзе баржей приємне друженє, а вец од септембра знова почню нови проби. У РКЦ очекую же и од єшенї комби будзе розвожиц дзеци, та ше наздаваю же будзе и вецей дзеци на пробох.