З ДРУГОГО БОКУ ТВОРЧОСЦИ: ДУША ПОЛНА, МОЖЕМ МИРНО СПАЦ

автор фес
1.6k Опатрене

И попри тим же од младосци була „навязана” на литературу, у природнох наукох нашла тото цо од вше любела – природу зоз шицку єй красу. Хто зна чи би настали телї збирки и писнї як намальовани приповедки,  кед би дзецинство нє препровадзела на салашу. Од дзецинства Мелания Римар почина свою приповедку

На Селищу зме мали барз красне дзецинство, нїч нам нє хибело. Од вчасней яри по позну єшень було овоци, а кед зме на поладнє поуганяли крави, знали зме же ше до штирох можеме пойсц купац на беґель, або спац. Було то наисце дожице, бо зме влєце спали у плєвнїку, и як и шицки дзеци, доказовали. Мац кеди-нєкеди пришла видзиц чи шпиме, а ми вец швидко заверали очи. Лєм ше ошмихла.

НАШО СЕЛИЩЕ

 – Мали зме и обовязки: позаметац двор з цеглох, коло кармикох, насцелїц сламу и под статок… И гоч цо зме робели, родичи тримали око на нас.  Шицки шесцеро зме були уключени до їх живота. Нє паметам векши звади, лаца нє було. Оцец бул благи и сцерпезлїви, алє зме знали  цо мож, а цо нє – памета Мелания дожица з братами и шестру на салашу.

20 Rimar02

Рамачово дзеци до школи ходзели пешо, вєдно зоз сушедовима, та Мелания нїґда нє ишла, а анї ше з нєй нє врацала сама на салаш. Жими памета як у сказкох. Кед вноци так завяло же ше шицко билєло и кед нє мож було нагаднуц кадзи дражка,  памета же оцец и сушед вчас ставали, за санки квачели гордов и роздрильовали шнїг же би дзеци могли дойсц по калдерму. При нєй вец вше дахто од старших, дзеци зоз школи дочековал.

Меланийов швет теди була оаза бесконєчно интересантних приповедкох. Якош теди настала и єй перша писня о Дїдови Мразови обявена у „Заградки”.

З приходом Рамачовей фамелиї до валалу, на Капущани, Мелания одкрива свой нови швет – литературу. Буц часц секциї „Швитаня”, або участвовац на  Митинґу поезиї, велїм младим Керестурцом, та и Меланиї то було як на вельке швето. З нєдзельових друженьох младих поетох, з   любови младей поетеси, наставаю „Ранши новини” – перша збирка хтору Мелания написала за одроснутих. Шицок єй литературни опус хтори настал после тей збирки, роснул и ище вше рошнє, наменєни дзецом.

КАЖДА ПИСНЯ МУШИ МАЦ ДУШУ

Мелания уж скоро трицец роки  вєдно зоз „Заградку”,  єдиним нашим часописом за дзеци. Од початку дзеведзешатих рокох прешлого вику  є и одвичательна редакторака того часопису.  Дипломовала ґеоґрафию, а кед ше уписала на Природно-математични факултет, теди нє могла знац же єй вибор познєйше будзе ище єдна капча з дзецми. Уж вецей як три децениї преклада на руски шицки учебнїки з ґеоґрафиї. Нєшка то нє лєм учебнїки, алє и преклади за „Просветни преґлед”, як и за Завод за вреднованє образованя з Беоґраду.

А прекладац, або лєпше поведзено, прешпивйовац писнї за дзеци – найволї. Гвари же тоту роботу кончи вноци у „трецей змени”, та и вона, окрем пшичка хторому мено Манди, чувар обисца. Так Мелания у розгварки покус франтує, а вец ознова преходзи на озбильни теми и слова же єй „Змайово дзецински бависка” оможлївели познанство з велїма познатима писателями як цо Драґан Лукич, Мошо Одалович, Мира Алечкович, або Ґроздана Олуїч, з хтору ище вше, з часу на час, побешедую прейґ телефона.

– Вельо прешпивюєм, алє мушим повесц же себе при тим давам вельку шлєбоду. Кажда писня муши мац душу, того ше тримам, и за тим стоїм – гвари Мелания, медзи иншим, добитнїца награди за популаризованє литератури за дзеци.

Награди мили, а ище милши кед их потримую найблїзши. На рамикох єдней своєй кнїжки праве тото и записала. Нїч би нє було без Ганчи, Мижа, Марчи и супруга Владимира.

Дзецинску радосц и галайк чуц було у каждим куцику обисца на  новосадскей Детелинари од початку дзеведзешатих рокох, а окреме теди кед ше народзело и треце дзецко у  Римаровей фамелиї. Була то Меланийова, алє и Владова оаза полна радосци и любови, плачу, дзекеди страху, зґодох и нєзґодох, та и слизох. Оаза у хторей ше почитовали прави вредносци и щири емоциї, шицко тото цо з єдним словом – живот. Владимир робел у рускей редакциї на Радию, Мелания, як уж спомнуте, у „Руским слове”.

ОАЗА МИРА

Остатнї седем роки Римарово жию у Петроварадину. Наша собешеднїца и колеґиня гвари же ше нїч нє пременєло, лєм єдно – вше ридше су шицки вєдно при столє. Обовязки троїм студентом рижнородни, а шицки тройо маю и свойо интересованя звонка науки. Кажде помали одходзи на свой бок зоз тим цо им родичи нє раз повторйовали: робиц чесно, буц одвичательни ґу роботи, почитовац других и давац, давац и давац…

20 Rimar03

– Ми ше часто бориме зоз спокусами и нє раз спаднєме до блата. Чежко нам ше з нього дзвигац, алє мушиме знац же гоч яка велька терха, мушиме стануц. Тото зме и дзецом гуторели, а знам же нам и вира у живоце дала вельо моци пребродзиц найчежше. И ми, як и нашо родичи, були будни док нам дзеци одрастали, и нє були сиґурни чи тото заренко хторе им даваме, спаднє на плодну жем.  Но, кед видзим же нашо дзеци навязани єдно на друге, порихтани помогнуц и порадзиц, єднак так ше радуєм як и теди кед приду дому, задовольни же у дачим посцигли успих. То тоти, мали, животни радосци хтори напаваю душу и пре хтори можеме мирно спац – гвари на концу Мелания Римар.

ЩЕСЦЕ

Кед Римарова порихтала свою першу збирку писньох за дзеци, учитель Михайло Ковач, хтори бул рецензент збирки,  окреме на штирох паперох вианализовал писнї и написал – добре, будзе, алє на тим треба робиц.

Часто ше врацала на учительово слова. Провадзела дзецинску литературу, писала о тим цо дзеци любя.   Знала же наймладши нєпреривно виглєдую швет хтори нє познаю, швет цихих радосцох, и скритих тайнох… Вше єй було на розуме же од того цо найдзеш, вреднєйше тото цо глєдаш.

КОНЦЕРТ

– Покойни оцец барз любел шпивац, аж и грал. И нас, дзеци,  вєдно з мацеру потримовал у тим цо зме любели.  Слава Богу, у фамелиї нїхто нє закопал свой талант до жеми, алє робел на нїм, та нєшка кед ше у Керестуре позбераме вєдно з нашима дзецми, маме и шпивачох, и оркестер, и дириґента… Гоч младих чежко „налапац”, кед нам ше уда, як даскельо раз по тераз, и когути навелько кукурикаю, а ми ше нє можеме лєм розисц  – гвари Мелания.

DSC_0040

ПОВЯЗАНИ ТЕКСТИ