НОВИ САД – У остатнїм тогорочним чишлє новинох „Руске слово”, хторе нєшка вишло як двочисло на 44-ох бокох, рубрика „Тижньовнїк” пише о означованю 25-рочнїцох Союзу Руснацох Українцох и Рускей матки, як и о других актуалносцох з политики.
„Духовни живот” зазначел два вельки подїї – швето Св. Миколая по юлиянским календаре и Рождество Христово, односно Крачун у Руским Керестуре, по григориянским календаре. На тих бокох и вистка о виборе нового Церковного одбору у новосадскей парохиї.
О схадзкох скупштинох општинох Кула, Вербас и Жабель, Совиту Месней заєднїци Руски Керестур, о нащивох вирних з Руского Керестура и Сеґедину пише на бокох „Наших местох”, док „Култура и просвита”, медзи иншим, призначела промоцию моноґрафиї о руским народним облєчиве у Музею Войводини, а ту и текст о вистави Албрехта Дирера и його сучаснїкох.
Рубрика „Людзе, роки, живот” читачом представя музичну уметнїцу, професорку Лїляну Барна Никитович з Кули, „Спорт” пише о шицких тогорочних успихох керестурского Спортского дружтва „Русин”, а як додатки вишли „Руске слово у швеце” и „Литературне слово”.
З тим числом новинох читаче достаню и дарунок – вибор приповедкох з кнїжки „Нєбо над Керестуром” Ирини Гарди Ковачевич, а пре наиходзци швета, перше число „Руского слова” у 2016. року видзе 14. януара.