НОВИ САД – З нагоди Дня ошлєбодзеня Нового Саду у Другей шветовей войни, на Кею у Новим Садзе всоботу, 22. октобра, отримана воєна парада на хторей вецей як 700 припаднїки Войска Сербиї приказали нове оружиє, опрему и свойо оперативни способносци. У статичних и динамичних приказох участвовали и припаднїки Специялней бриґади, Ричней флотили, Воєного воздухоплївства и Процивоздухоплївней одбрани, Ґарди и други єдинки Войска Сербиї.
Окрем велького числа гражданох, на шветочносци були и найвизначнєйши державни функционере – предсидатель Сербиї Томислав Николич, предсидателька Народней скупштини Мая Ґойкович, премиєр Сербиї Александар Вучич, предсидатель Скупштини АПВ Иштван Пастор, покраїнски премиєр Иґор Мирович, городоначалнїк Нового Саду Милош Вучевич, та представителє державного, покраїнского, городского, воєного руководительства и вирских заєднїцох.
Вончуюци Дзень ошлебодзеня, предсидатель Сербиї Томислав Николич на шветочносци гварел же Сербия у своєй историї вше була на боку правди, чесци и слави, на боку жемох побиднїцох у Другей шветовей войни, наглашуюци и же „Новосадянє и борци шицких националносцох дали вельке доприношенє у борби процив фашизму”.
Предсидатель Покраїнскей влади Иґор Мирович з тей нагоди визначел же у историї народох и державох нїч нє таке значне и святе як шлєбода. Сербия нєшка ище лєпша и розвитша як пред даскельо роками, лєбо децению-двома, а пре рост єй угляду и економиї, можлїве бешедовац о шлєбоди и моци хтора дїйствує як водзаца сила у нашей часци Европи, гварел Мирович
Вчера, 23. октобра, на сам Дзень ошлєбодзеня Нового Саду у Другей шветовей войни, городоначалнїк Милош Вучевич, предсидатель Скупштини Городу Нови Сад Здравко Єлушич, представителє Войска Сербиї, члени Городского одбору Здруженя борцох НОВ и делеґация Резервних воєних старшинох положели венци на Спомин теметове и на памятнїк Новосадскому партизанскому одряду на Ченею.
У Городскей хижи вчера уручени и Октоберска награда и Новемберска грамота.