З нагоди преглашеня Епархиї „Дзвони” и други публикациї

автор маф
561 Опатрене

РУСКИ КЕРЕСТУР –  З нагоди шветочносци преглашеня нашей Епархиї св. Миколая, хтора отримана прешлого викенду у Новим Садзе и Руским Керестуре, видати и даскельо публикациї, одн. памятки на тоту подїю, а пошвецени єй з єдней часци и 5. тогорочне число  Християнского часопису „Дзвони”.

„Дзвони” хтори видава рускокерестурска парохия св. Миколай вишли праве за саму преславу и то комплетно у фарбох и на квалитетнєйшим паперу, у друкарнї „Максима ґраф” у Петроварадину, та и надалєй буду цали у колору.

У нїх попри стандардних рубрикох и змистох, видруковани папово Були о преглашеню Епархиї и менованю першого епарха, представени и їх символи, одн. герби, а з тей нагоди ту и напис Янка Рамача „Грекокатолїцка Церква у живоце Руснацох у Южней Угорскей /Югославиї/Сербиї”.

З нагоди преглашеня Епархиї рускокерестурска парохия видала и свою репрезентативну брошуру. На 28 бокох зоз барз квалитетнима и розкошнима фотоґрафиями и по випатрунку и по содержаю, авторох Ярослава Папа, Сашу Палєнкаша, Иґора Орсаґа и Дарка Раца представена Катедрала зоз шицкима подробносцами, иконостас, и главни швета у нєй. Ту и Водица, 15 крижи и др.

Як то пракса на вельки подїї видрукована и окремна кнїжочка – Служебнїк зоз змистом Литурґиї по латински и церковнославянски, присутни доставали и хусточки и шали з лоґом новей Епархиї, обращик-памятку нового епарха кир Георгия, як и флаєр икони св. Миколая хтору Епархиї подаровал наш иконоґраф о. Михайло Й. Гарди, протоєрей ставроформ, парох у Метлики у Словениї, по походзеню Керестурец и Кулянєц.

За тоту нагоду предавало ше и други памятки на тоту подїїю як цо хемийски пенкала, привязки, нотеси, маїци, хтори мож ище вше купиц на парохиї у Керестуре.

ПОВЯЗАНИ ТЕКСТИ