БЕОҐРАД – Понеже Влада Сербиї дотераз нє сполнєла спорозуменє хторе прешлого року подписала зоз штирома репрезентативнима синдикатами у образованю, вони наявели же на ютре отримаю штрайк спозореня, прецо у школох нє буду отримани перши наставни годзини у раншей и пополадньовей змени, пишу нашо медиї.
Предсидатель Синдикату занятих у просвити Слободан Брайкович гварел же вимагаю почитованє шицких точкох подписаного спорозуменя, а з хторим прешлого року закончени штрайк у школох. Вон здогаднул же Спорозуменє предвидзує же од 1. януара 2016. року у цалим явним секторе буду уведзени єдинствени платни класи и констатовал же з того очиглядно нє будзе нїч, як анї звекшаня плацох у явним секторе.
Одлука о ютрейшим штрайку принєшена 4. фебруара на схадзки штирох репрезентативних синдикатох, хтори буду вимагац звекшанє коефициєнту у априлу и октобру за штири одсто плаци, та виплацованє награди од 5 000 динари, цо предвидзене зоз Спорозуменьом и Окремним колективним контрактом.