КУЛА – За тераз єдине инвестицийне укладанє предвидзене з буджетом Општини Кула за идуци рок у Руским Керестуре то виробок проєктней документациї за явне ошвиценє, цо ше будзе робиц прейґ ЯП „Завод за вибудов” Кула, а вредносц тей роботи 120 000 динари. Понеже наявени ребаланси буджету, можлїве же буду заплановани ище даєдни проєкти.
Як то по новей одреднїци – за програмску активносц – керестурскей Месней заєднїци у буджету опредзелєни вєдно 6 милиони 42 000 динари, дзе за услуги по контрактох милион 103 000 динари, у тим ураховани и месни самодопринос, як и милион и пол динари за плаци и додатки двоїх занятих.
За функционованє ОШ „Петро Кузмяк” у општинским буджету опредзелєни 7 милиони 970 000 динари, а за функционованє Штреднєй школи 5 милиони 800 000 динари.
За Дом култури Руски Керестур за порядну програмску активносц наменєни 6 милиони 787 000 динари, а за окремни проєкти – за Драмски мемориял Петра Ризнича Дядї з општини 150 000, за Фестивал рускей култури „Червена ружа” 350 000, а за „Костельникову єшень” 100 000 динари. Понеже и самодопринос ураховани до буджету, вец за „Черену ружу” буду опредзелєни ище 400 000 динари.
За витворйованє правох националних меншинох у кулскей општини, у буджету опредзелєни 750 000 динари.
През рок буду розписовани конкурси за нєвладово орґанизациї, односно здруженя гражданох у вецей спомедзи 15 програмских цалосцох.