НОВИ САД/ЖАБЕЛЬ – Коло 250 члени Социялдемокрактскей странки (СДС) зоз Жаблю, котри до тей странки прешли з Демократскей, на чолє з предсидательом Општини Жабель Чедомиром Божичом врацели ше до першобутней, Демократскей странки (ДС), сообщене з Покраїнского одбору ДС.
Медзи нїма и дзевецеро одборнїки Скупштини општини Жабель, та предлужа роботу у владаюцей векшини у Жаблю. По словох предсидателя Покраїнского одбору ДС Мирослава Васина, остатнї час и у других општинох зазначени подобни случаї, та здогаднул же ше пред трома тижнями цали Општински одбор СДС у Новим Княжевцу врацел до ДС.
Предсидатель Општини Жабель Чедомир Божич потолковал же под час подзелєня ДС, членство у Жаблю думало же Борис Тадич будзе будучносц тей странки, та станули на його бок. Медзитим, з часом похопели же „ДС єдина проевропска опозицийна странка, хтора може буц алтернатива актуалней власци”, гварел Божич.