Инициятива за заєднїцки фестивал у Свиднїку

автор  зам
1.1k Опатрене

СВИДНЇК (СЛОВАЦКА) – У Пряшовским самоуправним краю (ПСК) тих дньох отримана схадзка заступнїкох Краю, представительох свиднїцкей самоуправи и орґанизацийох хтори пририхтую два фестивали у Свиднїку – Швета културу Русинох-Українцох Словацкей и Русинского фестивалу о потримовки фестивалом, алє ище вецей о инициятиви за злучованю двох свиднїцких фестивалох до єдного – преноши русинФОРУМ вияви городоначалнїка Свиднїку Яна Голодняка и його заменїка Петера Пилипа, котри и заступнїк у ПСК, за портали „Поддуклянски новини” и „Корзар”.

Як гварел Голодняк, того року фестивали сиґурно буду окреме – Треци Русински фестивал од 25. по 31. май, а 61. Швето култури од 19. по 21. юний, медзитим, насампредз пре финансийни ефект, будзе ше пробовац обидва фестивали злучиц до єдного термину и орґанизовац их заєднїцки, о чим у Пряшове бешедоване з предсидательом ПСК Петром Худїком.

– Маме еминентни интерес же би Свиднїк бул центер Русинох, алє и Українцох котри жию у Словацкей. За тоти роки кельо сом у управи, прешвечел сом ше же Русинска оброда (хтора главни орґанизатор Русинского фестивалу) моцна орґанизация хтора заступа Русинох, алє и Союз Русинох-Українцох, хтори заступа Українцох, а з часци и Русинох котри прихильни Союзу. Мило нам же маме таки орґанизациї, алє ше у свиднїцкей самоуправи отворено бешедує о зєдиньованю  двох фестивалох – гварел Голодняк, наглашуюци же тота инициятива нє ма намиру очкодовац анї єден фестивал, односно спомнути орґанизациї.

– За тото нас опредзелюю финсиї, хтори нїґда нєдосц, а можебуц, кед би два орґанизациї здружели средства хтори доставаю за фестивали, то простор за єден вельки, квалитетни фестивал. Правда, сотруднїцтво тих двох орґанизацийох нє найидеалнєйше, кажда орґанизация, односно фестивал би могол мац свойо окремни акциї, а до главней, заєднїцкей програми бизме здружели шицки финансийни средства. Живот укаже же би то було добре ришенє – гварел городоначалнїк Свиднїку Ян Голодняк.

Його заменїк Петер Пилип додал же обидва орґанизациї приставаю на розгварку о тей инициятиви, як и же дальши крочаї у тим напряме буду водзени и у сотруднїцтве з предсидательом ПСК Петром Худїком.

– Наздавам ше же победзи здрави розум. Кед здружиме фестивали, програма будзе квалитетнєйша, а и орґанизацийно успишнєйша и годно го орґанизовац цали тидзень – гварел Петер Пилип, а преношу русинФОРУМ.

 

ПОВЯЗАНИ ТЕКСТИ