НОВИ САД – Уж традицийни вечар з нагоди Дня младосци – „Дзе(нь) младосц(и)?”, у Руским културним центре (РКЦ) у Новим Садзе отримани пияток, 27. мая, з тогорочну тему „Еротика Рутеника”, по записох Володимира М. Гнатюка, а у орґанизациї РКЦ и з потримовку Роботного цела за младеж Националного совиту Руснацох.
Спред РКЦ нащивительох привитали орґанизаторки и модераторки програми Александра Живкович и Саня Дивлякович, а вечар отворени з виставу фотоґрафийох Андреи Новак, хтори авторка направела инспирована з тему вечару – еротику.
У другей часци програми Александра Лендєр бешедовала о еротичних записох у рускей литератури хтори Володимир Гнатюк зазберовал коло 1900. року, а хтори ше, вєдно з другима записами, находза у кнїжки „Еротика рутеника”, обявеней 1995. року у виданю Секциї за скарб Дружтва за руски язик и литературу. Штири записи зоз спомнутей кнїжки пречитал Мирослав Малацко.
У трецей, музичней часци програми, шпивачки Саня Дивлякович, Александра Колбас и Танита Ходак одшпивали руски „шлєбоднєйши” шпиванки, тоти цо ше, як гварели шпивачки – шпива „покрадзме, дзешка у трецей сали”. Провадзел их оркестер у составе Мирослав Пап, Владимир Сивч, Атила Чибри, Мирослав Фейди и Єлена Ґудураш.
У рамикох вечару орґанизована и томбола – треца награда була повязка за очи, друга пальок, а перша фотоґрафия по виборе з вистави Андреи Новак. Пенєжи з томболи наменєни потримовки за видаванє ЦД-у зоз шпиванками з тей програми, цо друга фаза того проєкту – направиц авдио-запис.
Циль першого руского еротичного вечару бул розбиц предрозсудки и табуи и указац же еротика нє бридка и нє вулґарна, же нє припада порноґрафиї, алє є елемент уметнїцкей литератури.
Новосадска Матка пияток вечар була полна з публику, атмосфера була опущена, з отворену интеракцию учашнїкох и нащивительох, хтори потримовали програму з аплаузами и ошмихами.