Искра на єден крочай од Войводянскей лиґи

автор злк
611 Опатрене

КОЦУР – Фодбалере ФК „Искра” зоз Коцура приблїжели ше ище єден крочай блїжей ґу цилю, а то пласман до Войводянскей лиґи сивер, понеже стреду, 26. юния, у першим змаганю финала баражу за пополньованє Войводянскей лиґи на домашнїм терену победзели екипу ФК „Кридла Країни” зоз 1:0.

Ґол за Искрову побиду дал Тони Иван.

Стадион у Коцуре и на тот завод бул полни, а горучава нє завадзала любительом фодбалу же би на тото интересантне змаганє пришли и патраче зоз ширшого околїска.

Змаганє було интересантне, гоч за патренє нє таке красне, алє пре вельку значносц змаганя то и розумлїве. Обидва екипи ше намагали одбавиц тактично добре и без гришкох. Искра була лєпша у цалим змаганю и могла на реванш до Бачкей Паланки пойсц и зоз вигоднєйшим резултатом, а при резултату 0:0 Малацко премахнул пенал.

Реванш змаганє баражу исти екипи буду бавиц на нєдзелю у Бачкей Паланки, а управа Искри поволує шицких симпатизерох клуба же би пошли и там потримац своїх фодбалерох и помогнуц им же би ше пласовали до Войводянскей лиґи и на тот способ витворели найвекши успих у потерашнєй историї ФК „Искра”.

ПОВЯЗАНИ ТЕКСТИ