Уж узвичаєна пракса же у першим чишлє „Руского слова” у новим року, попри актуалносцох, правиме и прегляд значних подїйох хтори ше у рускей заєднїци случели у предходним року, указала ше як хасновита и у нашей, новинарскей роботи, окреме кед ше даєдна обласц, лєбо тема значна за руску националну заєднїцу и єй дружтвени живот провадзи длугши период. Як час преходзи а роки иду, вше чежше розлучиц же кеди ше цошка случело, кеди дацо розпочате а кеди є закончене, лєбо чи є закончене, а чи остало „у драже”. Дараз ше у таких ситуацийох мушело шпиртац и преврацац по масивних зарамикованих рочнїкох, тераз досц такой опатриц перше „Руске” у року – кед ше влонї наисце случело дацо вельке и важне, скоро сиґурно же є зазначене.
Окрем лоньских подїйох хтори наша Редакция вибрала до прегляду у чишлє пред вами, думам же на тим месце треба спомнуц ише два, чийо значенє по велїх критериюмох вираста понад рамики поєдинєчних рубрикох и ресорох. Перше, у 2018. року Драмски мемориял Петра Ризнича Дядї, єдна з ключних и найзначнєйпих културних подїйох при Руснацох наполнєл 50 роки тирваня. Друге, на державним, покраїнским и реґионалним уровню шветочно преславена 100-рочнїца Велькей народней скупштини у Новим Садзе и присоєдинєня войводянских обласцох ґу Сербиї. Обидва тоти ювилеї за нас були вельки и важни и з тей нагоди то ище раз треба надпомнуц.
Шлїдуюце „Руске слово”, хторе видзе праве помедзи урядовим датумом Националного швета Руснацох (17. януар), и його Централну шветочносцу хтора будзе у Руским Керестуре (19. януар), тиж по традициї будзе у знаку наяви Дня Руснацох. Пригодни написи чолнїкох Националного совиту и домашнїх, тематични текст хтори и свойофайтове здогадованє прецо Керестур бул и остал штредзиско бачванско-сримских Руснацох и представянє локалней самоуправи хтора бизовни партнер у витворйованю меншинских правох рускей националней заєднїци, буду часц тей наяви. Потим, у штвартим тогорочним чишлє „Руского” годно пречитац же як то наисце було на Дзень Руснацох, нє лєм у Керестуре, алє и у шицких наших местох дзе го славиме.