ДЮРДЬОВ – Вчера вечар у Дюрдьове отримана дзевята порядна Рочна скупштина Културно-уметнїцкого дружтва (КУД) „Тарас Шевченко”, на хторей єдногласно прилапени звит о роботи, финансйни звит, як и звит Надпатраюцого одбору за прешли рок. Єдногласно прилапени и план роботи и финансйни план за 2016. рок, а вибрана и нова членїца до Управного одбору Дружтва. Схадзку водзел предсидатель Скупштини Мирослав Чакан.
У Звиту о роботи за 2015. рок Чакан начишлєл шицки активносци секцийох, роботу аматерох и фаховцох, госцованя и орґанизованє рижних концертох, фестивалох и манифестацийох. Так вецей секциї мали 45 наступи, з чого 33 госцованя и 12 у Дюрдьове. Визначене же аматере КУД участвую на шицких наших манифестацийох и фестивалох, а прешлого року витворени и штири наступи у Словацкей и Польскей.
Прешлого року означена 70-рочнїца снованя КУД „Тарас Шевченко”, видати компакт-диск з Музичного вечару „Тал”, хтори бул пошвецени роботи музичного дїяча Михала Лїкара, орґанизовани 13. Фестивал жридлового шпиваня „Най ше нє забудзе”, а шицки секциї робели активно цали рок, як було и плановане.
Прешлого року у Дружтве наступели и госцуюци КУД и ансамбли, котри мали самостойни концерт, лєбо заєднїцки з домашнїма, а медзи нїма були госци з Миклошевцох з Горватскей, з Кладзанох и Прешова зоз Словацкей, з Руского Керестура, Нового Саду и други.
Члени Дружтва ше поряднє змагали на турнирох у рамикох Спортских бавискох (СБ) „Яша Баков” по наших местох, а дзепоєдним турниром були домашнї. Понеже того року, кед ше наполнюю 110 роки од народзеня Яши Бакова, буду отримани 25. СБ, члени дюрдьовского КУД порушаю инициятиву же би ше виробело бисту Яши Бакова.
Попри велїх наступох и орґанизованя програмох, того року плановане пририхтац и дзецинску представу и госцовац у иножемстве.
Цалосни прешлорочни розходи були коло милион 200 000 динари, а того року плановани приходи предвидзени на коло милион 300 000 динари. КУД свойо програми и роботу финансує дзекуюци потримовки Националного совиту Руснацох, Заводу за културу войводянских Руснацох, секретариятох АП Войводини, Општини Жабель и спознорох, поведзене на Рочней скупштини.
Понеже членїца Управного одбору КУД Геленка Раґаї дала задзекованє, место нєй вибрана Леона Ґоворчин, а як то традиция по схадзкох Скупштини, и тераз присутним були предложени домашнї єдла и напой.