НОВИ САД – У виданю НВУ „Руске слово” того тижня вишла ище єдна нова кнїжка за дзеци – „Котульки и ґомбульки” Ирини Гарди Ковачевич, хтору илустровала Мария Ковачевич. Понеже є наменєна найменшим дзецом, окремна увага дата на илустрациї и дизайн.
Илустрациї оптимистични, розбавени, весели, духовити, робени у окремно чежкей технїки акварелу, так же мож повесц же нашо дзеци предшколского и початного школского возросту достали прекрасну кнїжку.
Стихи Ирини Гарди Ковачевич духовити, прилагодзени попатрунку на швет дзецка од пейц до седем роки, кед воно одкрива швет коло себе и постава свидоме своєй индивидуалносци. Кнїжка збогацена и з блоком загадкох, а писателька хаснує богати, красни, функционални, местами и архаични руски язик, хтори у тих писньох указує свойо можлївосци.
Кнїжка кошта 300 динари, а мож ю купиц прейґ сайту „Руского слова” (www.ruskeslovo.com/chop), як и у „Руским слове” у Новим Садзе и у Дописовательстве „Руского” у Руским Керестуре.