НОВИ САД – Предсидатель Покраїнскей влади (ПВ) Иґор Мирович вчера, 9. новембра, приял делеґацию Рускей матки (РМ) Сербиї, у хторей були предсидатель Матки Дюра Папуґа, заменїк предсидателя Миломир Шайтош, членїца Управного одбору РМ Аранка Медеши и подпредсидателька Реґионалного одбору РМ за Срим Саня Тиркайло.
Як сообщене на порталу ПВ, представителє РМ предсидателя Мировича упознали зоз своїма найзначнєйшима активносцами на очуваню идентитету Руснацох у Сербиї, як и з проблеами з хторима ше Матка стрета у реализованю своїх програмох.
Иґор Мирович гварел же ПВ отворена за сотруднїцтво и же потримує програми з хторима ше унапредзує уровень витворйованя правох националних меншинох. На схадзки догварене о сотруднїцтве з Покраїнским секретариятом за културу, явне информованє и одношеня з вирскима заєднїцами хторе ше одноши на потримовку програмом РМ у идуцим року и визначене значенє Рускей и других маткох националних меншинох.
Як у писаней вияви за Рутенпрес гварел Миломир Шайтош, предсидательови Мировичови винєшени резултати 25-рочней роботи Рускей матки на полю чуваня идентитету руского народу, як на тих просторох так и у Европи, насампредз прейґ Шветового Конґресу Русинох/Руснацох/Лемкох и його Шветовей Ради.
Як гвари Шайтош, надосц бешедоване и о пред мешацом отриманим першим „Русин Филм Фесту” и репутациї хтору здобул, дзе предсидательови Покраїнскей влади презентоване же „гоч з боку орґанизаторох глєдана потримовка, Фестивал нє потримала анї єдна институция Руснацох Сербиї, за розлику од рижних и велїх институцийох векшинского, сербского народу, Општини Шид и Покраїнскей влади, як и дипломатских представительствох дзепоєдних державох”.
– Заключене же таки стан нєодвитуюци, же то будзе нужне пременїц, насампредз з помоцу одвитиюцих покраїнских секретариятох на хтори премиєр указал – гвари Шайтош, додаваюци же делеґация РМ предсидательови Покраїнскей влади винєсла и почежкосци з финансованьом єй проєктох з боку Националного совиту Руснацох и Заводу за културу войводянских Руснацох, алє и позитивне одношенє медийох по руски спрам Рускей матки.
