Ловарске дружтво „Заяц” и того року орґанизовало другу по шоре „Ґулашияду”, а за розлику од влонї, того року тото стретнуце було лєпше орґанизоване, а и нащивеносц була векша. Всоботу пополадню за найсмачнєйши ґулаш змагали ше 24 екипи, а медзи нїма були и два руски.
По словох предсидателя того ловарского дружтва Владимира Остоїна, участвовали коло 120 змагателє, а през порту ловарского дому прешло красне число нащивительох.
– Прешлого року ше варело з говедзини, а того року зме варели сарньов ґулаш. Кажда екипа достала три килограми сарньового меса, а як го порихтало завишело од нїх самих. Ми, як орґанизаторе, обезпечели столи, закрице од слунка и медалї за перши три места. Прешлого року була подла хвиля, а того року була красна, та було и добре розположенє – гвари Остоїн.
За варенє ґулашу були предвидзени три и пол годзини, а потим жири у составе Никола Аджибаба, Бране Чепски и Саша Тртич вибрал найлєпши три ґулаши. Екипи були углавним зоз жабельскей општини, алє и з дзепоєдних других местох, а перши три места завжали екипи з Дюрдьова.
Окрем музики з розгласу присутних забавял тамбурови оркестер, та попри смачного єдла, присутни уживали и у звукох квалитетней тамбуровей музики.