РУСКИ КЕРЕСТУР – У керестурскей парохиї св. оца Миколая зберанє гуманитарней помоци за вибеженцох пре войну у України найвироятнєйше будзе предлужене и шлїдуюци тидзень, гварел за Рутенпрес парох о. Михайло Малацко.
Акция почала пред тижньом и уж назберане надосц облєчива, средствох за особну гиґиєну, тирвацшей поживи, тиж и пенєжу, цо до парохийного уряду и надалєй мож принєсц кажди дзень од 8,30 до 12 годзин, а вовторок на 20 годзин до просторийох парохийного Каритасу.
Гуманитарну акцию, хтору иницировали поєдинци з нашей заєднїци, потримал наш еґзарх, преосвяшени владика Георгий Джуджар, та до нєй уключена и векшина наших парохийох.
Тирва и пенєжна акция за дзеци у України, хтору иницировал еґзархатски Каритас, вєдно з другима каритасами католїцких владичествох у Сербиї.