ЗЛАТИБОР – На Скупштини Заєднїци ґимназийох Сербиї, хтора од 19. по 21. май отримана на Златиборе, вєдно з директорами других ґимназийох перши раз участвовала и директорка Ґимназиї „Петро Кузмяк” з Руского Керестура Хелана Пашо Павлович.
Як Пашо Павловичова гварел за Рутенпрес, керестурска Ґимназия до тераз нє була видлїва у самим мену Школи, алє то виправене, так же була поволана на Скупштину Заєднїци ґимназийох Сербиї, на хторей розпатрани вецей актуелни теми.
Єдни з темох були стандарди и посцигнуца за конєц общого штреднього образованя, принципи реформованя ґимназийского образованя, та вименки Закона о основох системи образованя и воспитаня и Закона о штреднїм образованю и воспитаню. О темох водзена дискусия и дати суґестиї, хтори Заєднїца ґимназийох прешлїдзи компетентним орґаном.