БЕОҐРАД – Предсидатель Сербиї Томислав Николич вчера приял побиднїкох державного змаганя „Цо знаш о транспорту”, котри творели и репрезентацию Сербиї на нєдавно отриманим Европским змаганю з транспорту, сообщене з Кабинету предсидателя, а пренєсли и нашо медиї. Медзи штверима побиднїками и у репрезентациї Сербиї була и школярка 7. класи ОШ „Петро Кузмяк” з Руского Керестура Леонела Цифрич, котра вєдно зоз своїм наставнїком Зденком Шомодїйом вчера була на приєму при предсидательови Николичови.
Як Рутенпрес дознава од Шомодїя, Керестурци предсидательови Сербиї подаровали кнїжку „Лїтопис и история Руски Керестур 1754-1991” Юлияна Тамаша, малюнок Водици керестурского маляра Янка Бикия, туристичну брошуру Керестура, фляшку и погарики з мотивами руского партку, хтори виробели жени з „Байки”, як и промотивни материял Школи „Петро Кузмяк”.
У сообщеню з Кабинету предсидателя поведзене же Томислав Николич у розгварки з побиднїками на Републичним змаганю и школярами котри освоєли штварте место на Европским змаганю о транспортних предписаньох гварел же вони приклад як Сербия може буц медзи найлєпшима у Европи, лєм кед уложи труду и кед шицки зложни.
Предсидатель Сербиї окреме указал на значенє тимскей роботи, цо школяре на найлєпши способ демонстровали на Европским змаганю, як и на потребу же би ше озбильно похопело ученє транспортних предписаньох, пре заобиходзенє траґичних ситуацийох у хторих страдаю тоти котри бим мали представяц будучносц нашого народу.
Попри Цифричовей, на приєму при предсидательови держави були члени Репрезентациї Сербиї у транспорту Никола Йович з Нишу, Миляна Веселинович з Нишкей Банї и Петар Лукич зоз Сримскей Митровици, їх наставнїки и ґенерални секретар Авто-мото союзу Сербиї Предраґ Дюрдєвич.