КУЛА – У трох местох кулскей општини – у Руским Керестуре, Кули и Сивцу и того року будзе предлужени проєкт „Хижне допатранє и помоц у обисцу”, хтори витворюю ґеронто-ґаздинї.
За тоту намену Општина з буджету видвоєла милион 80 000 динари, а проєкт будзе реализовани прейґ Каритасу нашого Апостолского еґзархату, односно парохийного Каритасу у Керестуре, хтори за тоту нагоду до Општини конкуровал як здруженє.
У Доме за старих у Кули була орґанизована и седемдньова обука за ґеронто-ґаздинї и пестовательки, котри положели испити и достали лиценцу, а преподавали им фахово тренере Каритасу. Обука витворена прейґ Републичного заводу за социялну защиту Републики Сербиї.