Познати телевизийни водитель Оливер Млакар, вєдно зоз своїм колеґом з емисиї „Мали тайни вельких майстрох у кухнї” Стевом Карапанджом, бул водитель першей Конференциї „Food Тalk” (Фуд Ток) хтора отримана у юнию 2013. року на Салашу 137.
Тогорочна конференция будзе отримана 3. юния на Рибарским острове у Новим Садзе, а Оливер Млакар ознова будзе домашнї. „Моя кравичка Фуд Ток 2016” отвори Кристин Моро, амбасадорка Републики Французкей и Ґоран Сечуйски, секретар за привреду Городу Нови Сад.
Того року будзе ше бешедовац о револуциї на ґлобалней кулинарскей сцени, о тим хто нови нащивителє наших ресторанох, о орґанскей продукциї и ҐМО, о иновацийох у цукрарстве, а представя ше и нови винаре у реґиону.
На Конференциї „Фуд Ток” буду участвовац и Тамара Оґнєнович, Душка Йованич, Ничим Изазван, Филип Чирич, Даниєл Колетич, Радован Йокич, Томислав Иванович и велї други.
Под час Конференциї буду поставени столи зоз националну кухню иножемних амбасадох у Беоґрадзе, а шицок пенєж од предатей поживи будзе донировани Дому за дзеци и младих з почежкосцами у розвою у Ветернику.
За розвагу после напартого дня будзе задлужена ґрупа „Абсолутно романтичне”.
Єден од медийских партнерох Фуд Ток-а и НВУ „Руске слово”, а цалу програму тогорочней Конференциї мож опатриц на сайту https://www.color.rs/foodtalk2016.