ДЮРДЬОВ – Фодбалере дюрдьовскей „Бачки” всоботу, 9. фебруара одбавели перше приятелькске змаганє на домашнїм терену з Фодбалским клубом „Борац” зоз Шайкашу котри у Войводянскей лиґи. Змаганє закончене з 0:2.
– Нє важни резултат, важне же би ше фодбалере закладали и вибежали змаганє. Тренинґи лєм цо почали, так же зме анї нє могли обчековац лєпше бависко и резултат. Тото змаганє була нагода же би ше нашо фодбалере указали и доказали, важне ми же би викристализовали бависко. Змагали ше и млади фодбалере з подростку, бо плануєме подмладзиц перши тим – гварел Раденко Шарович, тренер першого тима Фодбалского клуба „Бачка” з Дюрдьова котри розполага зоз трицец бавячами.
Приятельски змаганя значни же би нє було монотоно и стереотипно, та ше Управа клуба заклада же би фодбалере мали цо вецей таки змаганя. Вони ше буду отримовац на помоцним терену споза будинка ФК „Бачка” у пополадньових годзинох, найвироятнєйше з початком на 14.30 годзин.
На соботу, 16. фебруара буду бавиц з ФК „Напредак” Надаль, а ютредзень, на нєдзелю, 17. фебруара з ФК „Юґович” Кач.