ДЮРДЬОВ – У Основней школи „Йован Йованович Змай”, внєдзелю вечар, 27. януара, зоз шветочну програму означена школска слава Святи Сава.
Пред програму у голу Школи, як и каждого року, пред швичку и колївом пошвецена икона, як и славски колач котри потим розламали кумово. Обряд пошвецаня служел дюрдьовски православни парох о. Петар Дюкич, после чого прешлорочни кумово, члени Школскей новинарскей секциї, придали кумовство новим членом Школскей литературней секциї.
У програми, хтору пририхтал школски колектив зоз школярами висших класох, присутних здогадли на живот св. Сави през драмски слички, шпиванки и поезию. Цала програма виведзена на сербским язику.
У програми школску славу шицким повинчовала директорка Школи Вукица Петрович. Присутни на програми були дзеци, їх родичи и заняти у Школи, як и Радован Чолич предсидатель СО Жабель, Лазар Чонкич, член Општинскей ради задлужени за образованє и Душанка Джамбас, предсидателька Совиту МЗ Дюрдьов.
Пред шветочну програму за дзеци бул орґанизовани одход до православней церкви дзе отримана Служба з нагоди того швета.