ВОЙВОДИНА/КУЛА – Того тижня представителє Покраїнского секретарияту за польопривреду, водопривреду и лєсарство почали обиходзиц локални самоуправи у Войводини, же би польопривреднїком представели плановани конкурси за тот рок, а на пияток, 6. фебруара, конкурси буду представени у Кули.
Стретнуце будзе на 18 годзин у сали Скупштини општини Кула, а спред Секретарияту буду бешедовац Слободан Теофанов и Миливой Петрович.
Циль тих нащивох же би польопривреднїки на час достали потребни информациї пре планованє своїх укладаньох, та их на пияток достаню и шицки заинтересовани польопривреднїки з местох кулскей општини.
Представителє спомнутого секретарияту представя способ и критериюми додзельованя безповретних средствох, конкурси Секретарияту и кредити хтори додзелюю три фонди АП Войводини.
Нащиви локалним самоуправом орґанизовал Секретарият, у сотруднїцтве з польопривреднима фаховима службами у Войводини, а буду тирвац по конєц марца.
Розпорядок нащивох ше обявює тижньово, а мож их провадзиц на сайту – www.vojvodina.gov.rs