Кампаня без закупених странкових ТВ-терминох

автор ртв/зам
1.1k Опатрене

БЕОҐРАД – Предвиберанкова кампаня перши раз прейдзе без закупених терминох странкох на телевизийох, предвидзене з новима правилами хтори запровадзело Реґулаторне цело за електронски медиї (РЕМ), пишу вчерайши „Вечернї новосци”.

Як толкую у РЕМ-у, тото правило запровадзене прето же би странки хтори маю вельки буджети нє закупели вельке число годзинох на телевизийох.

Як пишу „Новосци”, митинґи годно емитовац, алє после оцени редакторох, як часц предвиберанковей програми и без дискриминациї странкох.

Новосц и же комерциялни телевизиї зоз странками буду мушиц подписац контракти о сотруднїцтве пре емитованє предвиберанкового материялу, а дотераз тоту обовязку мали лєм явни сервиси.

Емитере муша почитовац Правилнїк о обовязкох давательох медийских услугох под час кампанї, а медзи иншим, вон предвидзує же предвиберанкову програму нє мож емитовац под час и найменєй 10 минути пред, лєбо по емитованю емисийох за малолїтних.

Правилнїк предвидзує и забрану емитованя предвиберанковей програми представяюци ю як информативну, або даяку другу програму, а шицки лїстини муша буц заступени, без дискриминациї.

Телевизиї нє шму у главних терминох, як висти дня и главни наслови, обявйовац виглєдованя явного думаня, а политичаре под час кампанї нє шму буц госци у забавних емисийох, бавених, дзецинских и подобних програмох, з винїмком кед тота програма знята голєм рок пред розписованьом виберанкох, наводза „Новосци”.

ПОВЯЗАНИ ТЕКСТИ