НОВИ САД – Вовторок, 13. октобра, представена апликация за урядове кандидованє Нового Саду за доставанє титули Европскей престолнїци култури 2021. року. Нови Сад кандидатуру урядово прида 23. октобра, на Дзень ошлєбодзеня городу у Другей шветовей войни.
– Вєдно и єдинствено наступаме и намагаме ше же би Нови Сад постал Европска престолнїца култури 2021. Пре цо лєпши способ промовованя културки Нового Саду, до того процесу уключени шицки институциї, явни сектор, нєвладови сектор и розлични уровнї власци – гварел городоначалнїк Нового Саду Милош Вучевич.
На кандидатури за Европску престолнїцу култури 2021. ше роби уж штири роки, а як найзначнєйши адут при доставаню титули годзен буц проєкт „Нови Сад – Младежска престолнїца Европи 2018. року”.