ВЕРБАС/КОЦУР – Општину Вербас, а потим и Добродзечне огньогасне дружтво у Коцуре вчера нащивела представителька Каритасу Австриї Михаела Кондак. Нагода за нащиву була провадзенє реализациї проєкту превенциї елементарних нєпогодох у хторим участвовала вербаска општина, а финансовал Каритас Австриї.
Кондакову и координатора проєкту Каритасу Сербиї Елемира Джуджара у Општини Вербас привитали предсидатель Општини Милан Ґлушац, член Општинскей ради Душко Чутило и директор ЯЗИП Марко Дюркович.
Представителє општини з Кондакову бешедовали о часци проєкту у хторей будзе посадзени витрозащитни пас на драги Вербас-Фекетич, дзе пред даскельо роками були вельки наноси шнїгу. Каритас Австриї обезпечел 700 000 динари, за цо на тим просторе буду засадзени коло 9 000 черяки и коло 500 древа, а часц желєнїдла будзе посадзена и на драгох у Деспотове и Савиним Селу.
З нагоди нєдавней донациї за роздрильовач шнїгу, як и числени акциї на ожелєньованю, у Коцуре ше Кундакова стретла з коцурскима огньогасцами, на чолє з предсидательом Златком Надьфейом, та предсидательом Коцурского здруженя младих Стеваном Самочетом, а госцинску у Коцуре дочекал и секретар Огньогасного союзу Войводини Мирослав Миланович.
Представителє Каритасу нащивели и драгу Вербас-Фекетич на хторей почина садзенє витрозащитного пасу, а у Коцуре подобна акция з помоцу Каритасу будзе на соботу.
