ШИД – Пондзелок, 28. септембра, директор Каритасу Сербиї о. Владислав Варга и директор Каритасу Сримскей бискупиї о. Йозо Дуспара, у Шидзе бешедовали з парохами грекокатолїцких парохийох у Шидзе и Беркасове о. Михайлом Режаком и о. Владимиром Еделинским Миколком, як и з римокатолїцким священїком о. Никицом Божняковичом, о уключованю до помоци вибеженцом з блїзкого востоку котри приходза до Шиду и шидскей општини.
После поради зоз священїками, двоме директоре Каритасу на Принциповцу, дзе вибеженци дочасово змесцени, бешедовали з представителями Червеного крижу Шиду, Червеного крижу Сербиї и Комесарияту за вибеженцох о координованей помоци вибеженцом.
Каритас Сербиї, попри у Прешеву, Суботици и Канїжи, понукнул помоц и вибеженцом на подручу Шиду, та догварене же Каритасова помоц пошвидко придзе до тамтейших парохийох, дзе буду направени пакети з поживу и особну гиґиєну, хтори ше подзелї вибеженцом котри сцигую до шидскей општини.
По законченю схадзкох, представителє Каритасу бешедовали и з вибеженцами на Принциповцу.