СЕРБИЯ – Почало применьованє нового Правилнїку з обласци здравственого осиґураня, хтори реґулує и плаценє партиципациї у 2015. року. Особом ошлєбодзеним од плаценя партиципациї, тот податок будзе писац и у здравственей кнїжочки.
Од плаценя партиципациї ошлєбодзени воєни инвалиди, шлєпи особи, нєрухоми особи, хаснователє надополнєня за цудзе допатранє, а цалком ошлєбодзени добродзечни давателє креви котри крев дали дзешец, лєбо вецей раз. Тоти котри крев дали менєй як дзешец раз, од плаценя партиципациї ошлєбодзени 12 мешаци после каждого даваня.
Партиципацию за здравство нє плаца и социялно загрожени катеґориї котри нє плаца здравствене осиґуранє, алє ше воно финансує з буджету Републики Сербиї, як и гражданє и члени фамелийох чийо мешачни приходи нє векши од предписаного цензусу за ошлєбодзованя од плаценя партиципациї.
Того мешаца цензус виноши 21 296 динари за тих хтори жию у заєднїцким ґаздовстве, а 28 184 динари за особи котри жию сами.
За доставанє ошлєбодзеня од плаценя партиципациї до филияли Фонду за здравствене осиґуранє треба придац вимогу, потвердзенє роботодавателя о заробку, лєбо чек з пензиї и уверенє о маєтку.