БЕОҐРАД – Министер здравя Златибор Лончар у Скупштини Сербиї потолковал же вименки Закона о здравственей защити потребни же би ше створело условия за унапредзенє роботи здравствених установох и приватней пракси.
Вименки предвидзую же би приправнїцки стаж за гевтих котри маю високу фахову приготовку тирвал шейсц мешаци, нє лєм за дохторох общей медицини, алє и за дохторох стоматолоґиї, дипломованих фармацеутох, биохемичарох, та медицински шестри котри закончели факултет здравственого фаху.
Будзе и ушорена обласц доставаня, обнавяня и браня лиценци, а утаргнє ше можлївосц же би особа котрей занавше вжата лиценца окончовала здравствени роботи з надпатраньом особи котра ма лиценцу. Лончар здогаднул же велїм здравственим роботнїком концом 2015. року виходзи лиценца, а значне число нє ма достаточно боди за єй обнавянє.
Як гварел министер, вименки предвидзую же би ше поняце здравственого роботнїка одношело и на наставнїкох и сотруднїкох на факултетох котри преподаваю медицински предмети, та на гевтих котри нє преподаваю тоти предмети, алє робя у здравствених установох.