ЖАБЕЛЬ – Пре економску нєрозвитосц, нєвигодни условия за биванє, мале число високообразованих, високи трошки образованя и значне число хасновательох социялней помоци, оштина Жабель ше у рамикох Индексу розвою городох и општинох указала як нєвигодна за живот. Индекс виробел Тим за социялне уключованє и зменшанє худобства при Влади Републики Сербиї и раз рочнє ше го ажурира з новима податками.
Штреднї нето заробок у Жаблю виноши 35 994 динари, цо менєй од републичного просеку, хтори 43 932 динари. Занятосц гражданох у општини дакус спод просеку, цо нє нательо алармантне, алє кед слово о ступню образованя, високообразованих жительох єст лєм 5,8 одсто.
Трошки образованя по жительови релативно високи и виноша 14 453 динари, наведзене у Индексу розвою городох и општинох. Гоч число занятих лїкарох релативно високе, здравствени стан у општини нєвигодни.
Безпечносц, дружтвена партиципация, почитованє людских правох и чувствительних ґрупох – обласци з хторима ше Жабель може похвалїц.