РУСКИ КЕРЕСТУР – У керестурским хотаре уж штредок сезони обераня паприґи, а упечатки продуковательох, одкупйовачох и фаховцох же тогорочни род слабшого квалитету як прешлого року, цо пошлїдок високих температурох, а без паданьох.
За розлику од лоньского, удатного роду, кеди продукователє мали коло 80 одсто паприґи першей класи, тераз ситуция процивна, та єст коло 80 одсто паприґи другей класи, а першей лєм коло 20. Квалитет того року подруцел, алє квантитет подобни як и влонї.
Паприґу мож досц лєгко предац, понеже у валалє єст коло 10 одкупни места, а уж два тижнї по Керестуре ходза и накупци. З початних 65 динарох за кґ за першу класу, цена спадла на 43 до 45 динари за кґ, док ше паприґу другей класи предава по коло 25 динари. Як дознава Рутенпрес, дзепоєдни одкупйоваче маю аж и катеґорию помедзи першу и другу класу, хторей цена 33 динари, а одкупює ше и порезану паприґу.
Продукователє и того року посадзели найвецей роговей паприґи, хтора и найглєданша, а одкупйоваче ю предаваю домашнїм фабриком за преробок желєняви, лєбо фирмом хтори ю дистрибую по Сербиї, алє и до сушедних жемох.
Парасти паприґу предаваю и на пияцох, дзе пакована у мещкох кошта коло 60 динари за кґ, а на меранє ше ю предава за 70 до 80 динари.
